अहमदनगर (दि.२७ एप्रिल):-अहमदनगर शहर व परिसरात चैन स्नॉचिंगच्या घटना वारंवार घडत असून त्या थांबायचे नाव घेत नसल्याचे पुन्हा एकदा समोर आले आहे.मोपेड गाडीवर बहिणीसोबत चाललेल्या महिलेच्या गळ्यातील १ तोळा वजनाची सोन्याची चेन पाठीमागून मोटारसायकलवर आलेल्या चोरट्याने हिसका मारून तोडून नेल्याची घटना बुधवारी (दि.२४) रोजी रात्री ८ च्या सुमारास पोलीस ठाण्याच्या हद्दीतील केडगाव बायपास रोडवर घडली आहे.याबाबत संगीता पुंडलीक मोरे (वय ४२,रा.आदिशक्ती बंगलो,नेप्ती नाक्यासमोर,दातरंगे मळा ) यांनी गुरुवारी (दि.२५) दुपारी कोतवाली पोलिस ठाण्यात फिर्याद दिली आहे.
फिर्यादी मोरे या त्यांची बहिण नंदिनी भरत भोज यांच्या सोबत मोपेड गाडीवर केडगाव बायपास चौकात एका कार्यक्रमासाठी कल्याण रोड बायपास चौकातून केडगाव कड़े चाललेल्या होत्या.रात्री ८ च्या सुमारास केडगाव बायपास चौकात उड्डाणपूल शेजारील रोडने त्या जात असताना त्यांच्या पाठीमागून काळ्या रंगाच्या मोटारसायकल वरून एक अनोळखी इसम आला.त्याच्या तोंडाला रुमाल बांधलेला होता.त्याने अचानक फिर्यादी मोरे यांच्या गळ्यातील सोन्याची चेन बळजबरीने हिसका मारुन खेचुन घेवुन भरधाव वेगात निघुन पुढ़े गेला,त्यानंतर फिर्यादी यांनी त्याचा पाठलाग करण्याचा प्रयत्न केला मात्र त्यांने टोलनाक्याच्या अगोदर युटर्न घेवुन पुन्हा परत पाठीमागे भरधाव वेगात निघुन गेला असल्याचे फिर्यादीत म्हंटले आहे.
या फिर्यादीवरून कोतवाली पोलिसांनी अज्ञात चोरट्याविरुद्ध भा.दं.वि.कलम ३९४ प्रमाणे गुन्हा दाखल केला आहे.दरम्यान नगर शहर परिसरात गेल्या काही दिवसांपासून चेन स्नॉचिंगच्या घटना या वारंवार घडत आहेत.वारंवार होणाऱ्या घटनांमुळे शहर परिसरात महिलांना घराबाहेर पडणे मुश्कील झाले आहे.महिला वर्गात एक भीतीचे वातावरण निर्माण झाले आहे.
ज्या भागात ही चोरी झाली आहे तो भाग कोतवाली पोलीस ठाण्याच्या अंतर्गत येतो पोलीस ठाण्याचा महत्त्वाचा कणा म्हणजे गुन्हे शोध पथक त्यावरच पोलिस स्टेशनची भिस्त अवलंबून असते.मात्र गुन्हे शोध पथकात भरपूर कर्मचारी आहेत परंतु त्यांची कामगिरी खास अशी दिसून येत नाहीये गुन्हे शोध पथकाने तरी अशा गुन्ह्यांचा शोध लवकरात लवकर लावावा की ज्याने चैन स्नाचींगला आळा बसेल अशी अपेक्षा स्थानिक नागरिकांनी व्यक्त केली आहे.दरम्यान पोलिसांनी रात्रीची गस्त वाढवून या चोरट्यांचा बंदोबस्त करावा अशीही मागणी नागरिकांमधून होत आहे.