अहमदनगर (दि.६ ऑगस्ट):-नेवासा तालुक्यातील खडका येथे अत्यंत दुर्दैवी घटना घडली असून,मागील भांडणाच्या कारणावरुन तरुणाच्या पोटात मारहाण केल्याने त्याचा मृत्यू झाल्याची घटना घडली आहे.याबाबत मयत तरुणाच्या वडिलांच्या फिर्यादीवरुन नेवासा पोलीस ठाण्यात ३ जणांवर गुन्हा दाखल झाला आहे.
याबाबत फिर्यादी भाऊसाहेब परभत नेमाणे (मूळ रा. शिरेसायगाव,ता.गंगापूर हल्ली रा.खडका फाटा ता.नेवासा) यांनी फिर्याद दिली आहे.31 जुलै रोजी फिर्यादी यांचा मुलगा शरद नेमाणे हा सायंकाळी ५.३० वाजता घरासमोर उलट्या करत असताना दिसला.त्याला त्याबाबत विचारले असता सकाळी ११.३० वाजता अमोल खेमनर याच्या शेतात गेलो असता मागील मारहाणीच्या कारणावरून अमोल किसन खेमनर, वच्छलाबाई किसन खेमनर व किसन खेमनर यांनी शिवीगाळ दमदाटी करुन लाथाबुक्क्याने पोटात मारहाण केली असल्याचे सांगितले.
मुलगा शरद यास पोटदुखी व उलट्याचा त्रास होत असल्याने त्याची आई सुशीलाबाई या मुलगा शरद यास नेवाशातील खासगी दवाखान्यात उपचारासाठी घेऊन गेल्या असता त्यानंतर दुसर्‍या दिवशी मुलगा शरद याचा त्रास वाढतच गेला त्यास सरकारी रुग्णालयात दाखल केले असता त्यास २.३० वाजता मयत घोषित केले.दिलेल्या फिर्यादीवरून अमोल किसन खेमनर, वच्छलाबाई किसन खेमनर व किसन खेमनर यांच्यावर भारतीय न्याय संहिता कलम 103(1), 115(2), 351(2) व 352 कलमान्वये गुन्हा दाखल करण्यात आला आहे.अधिक तपास पोलिस करत आहेत.