🕊️आदर्श माता पार्वताबाई भालेराव यांचे वृद्धापकाळाने निधन

🕊️आदर्श माता पार्वताबाई भालेराव यांचे वृद्धापकाळाने निधन

संगमनेर प्रतिनिधी (नितीनचंद्र भालेराव):-हिवरगाव पावसा (ता. संगमनेर) येथील आदर्श माता पार्वताबाई केशव भालेराव (वय ९०) यांचे दिनांक १५ ऑक्टोबर २०२५ रोजी वृद्धापकाळाने निधन झाले. त्यांच्या निधनाने परिसरात हळहळ व्यक्त होत आहे.पार्वताबाई या सुप्रसिद्ध कवी,गायक व समाजप्रबोधनकार हरिचंद्र केशव भालेराव यांच्या मातोश्री होत. हरिचंद्र भालेराव यांनी कविता व गीतांच्या माध्यमातून आंबेडकरी चळवळीला कलात्मक बळ देत समाजजागृतीचे कार्य केले आहे.

पार्वताबाई यांचा जन्म पोखरी बाळेश्वर येथे झाला होता. त्यांच्या शांत, संयमी आणि सुस्वभावी व्यक्तिमत्वामुळे त्यांना गावात “आदर्श माता” म्हणून ओळखले जात असे. विवाहानंतर त्या हिवरगाव पावसा येथे स्थायिक झाल्या. पती केशव भालेराम भालेराव यांच्यासह त्यांनी कष्ट, प्रामाणिकपणा आणि संयमाच्या बळावर संसाराचा गाडा उत्तमरीत्या चालविला.त्यांना सरस्वतीबाई आणि हरिचंद्र अशी दोन अपत्ये असून दोघांनाही उत्तम संस्कार देऊन त्यांनी स्वावलंबी घडविले. मुलगा हरिचंद्र यांनी मुंबईतील के.सी. कॉलेज, चर्चगेट येथे ३७ वर्ष सेवा बजावून निवृत्ती घेतली असून कवी-गायक म्हणून समाजात विशेष स्थान मिळविले आहे. त्यांच्या पत्नी पुष्पा यांनी मातोश्रींची वृद्धापकाळात मनापासून सेवा केली.

पार्वताबाई यांच्या निधनानंतर विविध क्षेत्रातील मान्यवरांनी शोक व्यक्त केला आहे. यात रिपब्लिकन पार्टी ऑफ इंडियाचे प्रदेशाध्यक्ष (उपाध्यक्ष) श्रीकांत भालेराव, लोककला क्षेत्रातील मास्टर रघुवीर खेडकर, राजहंस दूध संघाचे संचालक डॉ. प्रमोद पावसे, भाजपा माजी तालुकाध्यक्ष काशिनाथ पावसे, सरपंच सुभाष गडाख, भाजपाचे तालुका सरचिटणीस गणेश दवंगे, गायक मास्टर विलासकुमार (राज) गायकवाड, सौ. शेषकन्या पुणेकर लोकनाट्य तमाशा मंडळ, भारत नागपूरकर, सविता पुणेकर, सुनील औरंगाबादकर आदींचा समावेश आहे.पार्वताबाई यांच्या निधनानंतर गावात शोककळा पसरली असून शुक्रवार, दि. २४ ऑक्टोबर २०२५ रोजी हिवरगाव पावसा येथील मारुती मंदिर सामाजिक सभागृहात जलदान विधी संपन्न होणार आहे.त्यांच्या पश्चात मुलगा हरिचंद्र, मुलगी सरस्वती, सुन पुष्पा आणि नातवंडे असा परिवार आहे.

👉 “आई म्हणजे ममतेचा सागर, त्यागाची मूर्ती आणि घराचे आध्यात्मिक केंद्रबिंदू” – पार्वताबाई यांच्या आयुष्याने याचा प्रत्यय दिला.