🥋 कराटेच्या किकसोबत यशाची झेप! जिल्हास्तरीय स्पर्धेत स्नेहस्पर्शच्या चिमुकल्यांची पदकांची कमाई 🏅स्नेहालयच्या विशाल सेंटरमध्ये गुणवंत खेळाडूंचा उत्साहात बक्षीस वितरण सोहळा

🥋 कराटेच्या किकसोबत यशाची झेप! जिल्हास्तरीय स्पर्धेत स्नेहस्पर्शच्या चिमुकल्यांची पदकांची कमाई 🏅स्नेहालयच्या विशाल सेंटरमध्ये गुणवंत खेळाडूंचा उत्साहात बक्षीस वितरण सोहळा

अहिल्यानगर (प्रतिनिधी):-स्नेहालय संचलित स्नेहस्पर्श प्रकल्प येथील विशाल सेंटरमध्ये जिल्हास्तरीय कराटे स्पर्धेत यश संपादन केलेल्या मुलांचा बक्षीस वितरण सोहळा अत्यंत उत्साहात पार पडला. हा कार्यक्रम आज दिनांक ५ जानेवारी २०२६ रोजी सायंकाळी ७.०० ते ७.४५ या वेळेत आयोजित करण्यात आला होता.या जिल्हास्तरीय कराटे स्पर्धेत स्नेहस्पर्श प्रकल्पातील एकूण १५ मुलांनी सहभाग नोंदवला होता. त्यापैकी १३ मुलांनी ‘काता’ प्रकारात ब्राँझ पदक मिळवून प्रकल्पाचे नाव उज्वल केले.

विशेष उल्लेखनीय कामगिरी करणाऱ्या खेळाडूंमध्ये –

सुनील पंडित याने काता व फाईट या दोन्ही प्रकारांत ब्राँझ पदक,सार्थक सपकाळ याने काता प्रकारात सिल्व्हर पदक,तर विशाल काळे याने काता प्रकारात ब्राँझ व फाईट प्रकारात गोल्ड पदक पटकावले.

या यशस्वी खेळाडूंचा गौरव व सत्कार करण्यासाठी सदर कार्यक्रमाचे आयोजन करण्यात आले होते. कार्यक्रमाच्या अध्यक्षस्थानी स्नेहस्पर्श प्रकल्पाचे मानद संचालक आदरणीय संजय बंदिष्टी उपस्थित होते. त्यांनी मुलांचे मनापासून कौतुक करत खेळासोबतच शिक्षणातही सातत्य ठेवा, असे प्रेरणादायी मार्गदर्शन केले. तसेच भविष्यातील स्पर्धांसाठी कराटे क्लाससाठी आवश्यक साहित्य लवकरच उपलब्ध करून दिले जाईल, असे आश्वासनही त्यांनी दिले.यावेळी कराटे क्लासचे प्रशिक्षक माननीय वैभव देशमुख यांनीही सर्व मुलांचे अभिनंदन करत राज्य व राष्ट्रीय स्तरावर यश मिळवावे, अशी अपेक्षा व्यक्त केली.

कार्यक्रमाचे सूत्रसंचालन प्रवीण राठोड यांनी केले. प्रस्ताविक चंद्रकांत शेंबडे यांनी मांडले तर आभार प्रदर्शन धीरज मनवर यांनी केले.हा कार्यक्रम यशस्वी होण्यासाठी प्रकल्पातील कृष्णा बोरावके, सुभाष राठोड, कौशल्या शेंबडे, दिपाली बनसोडे, युवराज बनसोडे, सुजाता मासुळे व शुभम वेदपाठक यांनी विशेष परिश्रम घेतले.कराटेच्या माध्यमातून आत्मविश्वास, शिस्त व यशाचा मार्ग दाखवणाऱ्या या चिमुकल्या खेळाडूंनी उपस्थितांची मने जिंकत कार्यक्रम संस्मरणीय केला.