🚜अवैध वाळू वाहतुकीवर स्थानिक गुन्हे शाखेचा छापा.. लाखोंचा मुद्देमाल जप्त

🚜अवैध वाळू वाहतुकीवर स्थानिक गुन्हे शाखेचा छापा.. लाखोंचा मुद्देमाल जप्त

अहिल्यानगर (प्रतिनिधी):-पाथर्डी तालुक्यातील कोरडगाव शिवारात अवैध वाळू वाहतुकीविरोधात स्थानिक गुन्हे शाखेने मोठी कारवाई करत वाळू माफियांचे मनसुबे उधळून लावले आहेत. नाणी नदीपात्रातून बेकायदेशीररित्या वाळू उपसा व वाहतूक करत असताना गुन्हे शाखेच्या पथकाने छापा टाकून एक ट्रॅक्टर व एक ब्रास वाळू असा एकूण 6 लाख 10 हजार रुपयांचा मुद्देमाल जप्त केला आहे.

अहिल्यानगर जिल्ह्यात अवैध वाळू वाहतुकीला आळा घालण्याच्या दृष्टीने पोलीस अधीक्षक मा. श्री. सोमनाथ घार्गे यांनी स्थानिक गुन्हे शाखेला विशेष सूचना दिल्या होत्या. त्या अनुषंगाने स्थानिक गुन्हे शाखेचे पोलीस निरीक्षक श्री. किरणकुमार कबाडी यांच्या मार्गदर्शनाखाली स्वतंत्र पथक तयार करण्यात आले होते.पोलीस उपनिरीक्षक समीर अभंग यांच्यासह पोलीस अंमलदार दीपक घाटकर, बाळासाहेब नागरगोजे, भीमराव खर्से, किशोर शिरसाठ यांच्या पथकाने दि. 19 जानेवारी 2026 रोजी पाथर्डी पोलीस ठाणे हद्दीत अवैध वाळू उत्खननाबाबत माहिती संकलन सुरू असताना गुप्त बातमीदारामार्फत कोरडगाव शिवारातील नाणी नदीजवळील अमरधाम परिसरात ट्रॅक्टरच्या सहाय्याने चोरट्या पद्धतीने वाळू वाहतूक सुरू असल्याची खात्रीशीर माहिती मिळाली.

माहितीनुसार पथकाने तत्काळ घटनास्थळी धाव घेऊन छापा टाकला असता एक इसम ट्रॅक्टरमध्ये वाळू भरताना आढळून आला. त्यास ताब्यात घेऊन चौकशी केली असता त्याने आपले नाव संकेत राम गोरे (वय 19 वर्षे, रा. कोरडगाव, ता. पाथर्डी, जि. अहिल्यानगर) असे सांगितले. वाळू वाहतुकीचा परवाना विचारला असता त्याच्याकडे कोणताही अधिकृत परवाना नसल्याचे स्पष्ट झाले. तसेच सदर ट्रॅक्टर स्वतःचा असल्याचे त्याने कबूल केले.पोलिसांनी आरोपीकडून विना नंबरचा न्यू हॉलंड कंपनीचा ट्रॅक्टर (किंमत अंदाजे 6,00,000 रुपये) व 1 ब्रास वाळू (किंमत 10,000 रुपये) असा एकूण 6,10,000 रुपयांचा मुद्देमाल जप्त केला आहे.

या प्रकरणी स्थानिक गुन्हे शाखेचे पोलीस अंमलदार किशोर आबासाहेब शिरसाठ यांनी दिलेल्या फिर्यादीवरून पाथर्डी पोलीस ठाणे गुन्हा रजिस्टर नंबर 59/2026, भारतीय न्याय संहिता 2023 चे कलम 303(2) अंतर्गत गुन्हा दाखल करण्यात आला असून पुढील तपास पाथर्डी पोलीस ठाण्याचे अधिकारी करीत आहेत.ही संपूर्ण कारवाई पोलीस अधीक्षक सोमनाथ घार्गे यांच्या सूचनांनुसार व मार्गदर्शनाखाली स्थानिक गुन्हे शाखेच्या पथकाने यशस्वीरीत्या पार पाडली असून, अवैध वाळू व्यवसाय करणाऱ्यांमध्ये मोठी खळबळ उडाली आहे.