अहिल्यानगरच्या राजकारणातील ‘भाऊ’ काळाच्या पडद्याआड;ज्येष्ठ नेते भानुदास कोतकर यांचे वयाच्या ७४ व्या वर्षी निधन..
अहिल्यानगर (प्रतिनिधी):-जिल्ह्याच्या राजकारणात आणि सहकार क्षेत्रात दीर्घकाळ दबदबा निर्माण करणारे ज्येष्ठ नेते,आणि सहकार क्षेत्रातील मार्गदर्शक तसेच कृषी उत्पन्न बाजार समितीचे माजी सभापती,काँग्रेसचे शहर जिल्हाध्यक्ष भानुदास कोतकर यांचे वयाच्या 74 व्या वर्षी निधन झाले.अहिल्यानगरच्या स्थानिक राजकारणात आणि सहकार वर्तुळात ‘भाऊ’ म्हणून ओळखले जाणारे भानुदास कोतकर यांच्या निधनाने जिल्ह्याच्या राजकीय पटलावरील एक महत्त्वाचा कालखंड संपला आहे.भानुदास कोतकर हे गेल्या काही काळापासून वाढत्या वयाशी संबंधित आजार आणि प्रदीर्घ व्याधींशी झुंज देत होते. त्यांच्यावर रुग्णालयात उपचार सुरू असतानाच त्यांचे निधन झाले. त्यांच्या निधनाचे वृत्त समजताच अहिल्यानगर शहर व ग्रामीण भागातील विविध राजकीय पक्षांचे नेते, सहकार क्षेत्रातील पदाधिकारी आणि कार्यकर्त्यांनी तीव्र दुःख व्यक्त केले.भानुदास कोतकर यांचा जीवन प्रवास हा नगर शहराच्या स्थानिक स्वराज्य संस्था, राजकारण आणि सहकार क्षेत्राशी अत्यंत घट्टपणे जोडलेला होता.अहमदनगर नगरपालिकेच्या (सध्याची महानगरपालिका) काळात भानुदास कोतकर हे एक अत्यंत प्रभावी नेतृत्व म्हणून पुढे आले. त्यांनी स्वतःनगरसेवक पद भूषवले आणि नगरपालिकेच्या कारभारावर अनेक वर्षे एकहाती पकड ठेवली.नगर शहराच्या विविध नागरी विकासकामांमध्ये आणि प्रशासकीय वाटचालीत त्यांचा थेट प्रभाव राहिला.स्थानिक बँकिंग,पतसंस्था आणि सहकारी संस्थांच्या उभारणीत व बळकटीकरणात त्यांनी महत्त्वाची भूमिका बजावली.
विशेषतःस्थानिक पतसंस्थांचे जाळे उभे करून ग्रामीण व शहरी भागातील शेतकरी, लहान व्यापारी आणि सर्वसामान्यांना आर्थिक पाठबळ देण्याचा प्रयत्न त्यांनी केला.भानुदास कोतकर यांनी केवळ स्वतःपुरते राजकारण मर्यादित न ठेवता अहिल्यानगरमध्ये एक शक्तिशाली राजकीय केंद्र निर्माण केले.त्यांच्या कुटुंबातील सदस्यांनी नंतरच्या काळात महानगरपालिकेचे महापौरपद,जिल्हापरिषद आणि स्थानिक संस्थांमध्ये विविध महत्त्वाची पदे भूषवली. नगर शहराच्या राजकारणात ‘कोतकर गट’ हा अनेक दशके सत्तासमीकरणांच्या केंद्रस्थानी राहिला.भानुदास कोतकर यांच्या निधनाने अहिल्यानगरच्या राजकारणातील एका आक्रमक, मुत्सद्दी आणि स्थानिक समीकरणांवर मजबूत पकड असणाऱ्या नेतृत्वाचा अंत झाला आहे.