📰 महाबोधी महाविहार मुक्तीसाठी मुंबईत विराट महामोर्चा..“बौद्धांनी एकीची ताकद दाखवावी”- ना.रामदास आठवले..अहिल्यानगर जिल्ह्यातून भीमसैनिकांचा मोठा जनसागर रवाना होणार

📰 महाबोधी महाविहार मुक्तीसाठी मुंबईत विराट महामोर्चा..“बौद्धांनी एकीची ताकद दाखवावी”- ना.रामदास आठवले..अहिल्यानगर जिल्ह्यातून भीमसैनिकांचा मोठा जनसागर रवाना होणार

संगमनेर प्रतिनिधी (नितीनचंद्र भालेराव):-बुध्दगया येथील महाबोधी महाविहार हे जगातील बौद्धांचे सर्वोच्च श्रद्धास्थान असून ते बौद्धांच्या ताब्यात यावे, यासाठी देशभरातील बौद्ध जनतेत तीव्र भावना निर्माण झाली आहे. महाबोधी महाविहार मुक्तीसाठी आणि सन 1949 च्या बी.टी. ऍक्ट रद्द करण्याच्या मागणीसाठी येत्या 14 ऑक्टोबर रोजी मुंबईतील आझाद मैदानावर विराट महामोर्चाचे आयोजन करण्यात आले आहे.

या महामोर्चाचे आयोजन महाबोधी महाविहार मुक्ती आंदोलन कृती समितीच्या वतीने तसेच सर्व रिपब्लिकन गट, सर्व पक्षीय बौद्ध नेते आणि विविध बौद्ध संघटनांच्या संयुक्त विद्यमाने करण्यात आले असून, “गटतट विसरून सर्व आंबेडकरी व बौद्ध बांधवांनी शांततेच्या मार्गाने एकत्र येऊन आपली ताकद दाखवावी,” असे आवाहन रिपब्लिकन पक्षाचे राष्ट्रीय अध्यक्ष व केंद्रीय सामाजिक न्याय राज्यमंत्री ना. रामदास आठवले यांनी केले आहे.

महामोर्चाची सुरुवात दुपारी 12 वाजता मेट्रो सिनेमा येथून होऊन आझाद मैदानात होणार आहे. हा मोर्चा यशस्वी व्हावा म्हणून रिपब्लिकन पक्षाच्या सर्व गटांनी जोरदार तयारी सुरू केली आहे. दक्षिण मध्य व ईशान्य मुंबई पदाधिकारी आणि कार्यकर्त्यांची बैठक नुकतीच पार पडली.या बैठकीत प्रदेश उपाध्यक्ष तथा अहिल्यानगर जिल्हा संपर्कप्रमुख श्रीकांत भालेराव यांनी मार्गदर्शन करताना सांगितले की, “महाबोधी महाविहार मुक्तीसाठी बौद्ध बांधवांनी आता एकीची ताकद दाखवण्याची वेळ आली आहे. सर्वांनी गटतट विसरून महामोर्चा यशस्वी करावा.”भालेराव यांनी माहिती दिली की, अहिल्यानगर जिल्ह्यातून मोठ्या प्रमाणात भीमसैनिक मुंबईत रवाना होणार असून, या महामोर्चात जिल्ह्यातील बौद्ध समाज उत्साहाने सहभागी होणार आहे.