🔧विसापूर कारागृहातील ‘बंदी’ घडणार ‘स्वावलंबी मेकॅनिक’  शिक्षेला कौशल्याची जोड,पुनर्वसनाला नवी दिशा..! 

🔧 विसापूर कारागृहातील ‘बंदी’ घडणार ‘स्वावलंबी मेकॅनिक’  शिक्षेला कौशल्याची जोड,पुनर्वसनाला नवी दिशा..! 

अहिल्यानगर (दि.९ (प्रतिनिधी):-शिक्षा भोगून समाजात परतल्यानंतर सन्मानाने आणि स्वावलंबी जीवन जगता यावे, या उद्देशाने विसापूर खुल्या कारागृहातील बंद्यांच्या आयुष्यात परिवर्तन घडविणारा महत्त्वाकांक्षी उपक्रम सुरू करण्यात आला आहे. विसापूर जिल्हा खुले कारागृह येथे बंद्यांसाठी दुचाकी व तीनचाकी वाहन दुरुस्ती (मेकॅनिक) प्रशिक्षणाची सुरुवात करण्यात आली असून, या उपक्रमामुळे ‘बंदी’ ते ‘स्वरोजगार करणारा कुशल कामगार’ असा प्रवास शक्य होणार आहे.जिल्हा कौशल्य विकास, रोजगार व उद्योजकता मार्गदर्शन केंद्र तसेच जन शिक्षण संस्थान यांच्या संयुक्त विद्यमाने हा प्रशिक्षण उपक्रम राबविण्यात येत आहे. विसापूर जिल्हा खुले कारागृह (ता. श्रीगोंदा) येथे आयोजित या प्रशिक्षण वर्गाचे उद्घाटन सहाय्यक आयुक्त रविकुमार पंतम, जन शिक्षण संस्थानचे संचालक बाळासाहेब पवार आणि कारागृह अधीक्षक विजय सोळंके यांच्या प्रमुख उपस्थितीत करण्यात आले.

जिल्हाधिकारी डॉ. पंकज आशिया यांच्या संकल्पनेतून साकारलेला हा उपक्रम केवळ शिक्षा देण्यापुरता मर्यादित न राहता, बंद्यांच्या आयुष्याला सकारात्मक वळण देणारा ठरणार आहे. याबाबत माहिती देताना सहाय्यक आयुक्त श्री. पंतम म्हणाले की, “कारागृहाचा उद्देश केवळ शिक्षा भोगवणे हा नसून, शिक्षा पूर्ण केल्यानंतर संबंधित व्यक्ती समाजात सन्मानाने उभा राहावा, हे अधिक महत्त्वाचे आहे. या प्रशिक्षणाच्या माध्यमातून बंद्यांना प्रत्यक्ष व्यवसायासाठी आवश्यक कौशल्य प्राप्त होईल. प्रशिक्षण पूर्ण झाल्यानंतर वाहन दुरुस्तीचा स्वतःचा व्यवसाय सुरू करता यावा, यासाठी विविध शासकीय महामंडळांच्या माध्यमातून आर्थिक सहाय्य मिळवून देण्यासाठी मार्गदर्शन केले जाणार आहे.”

जन शिक्षण संस्थानचे संचालक बाळासाहेब पवार यांनी सांगितले की, “हे प्रशिक्षण यशस्वीरीत्या पूर्ण करणाऱ्या बंद्यांना शासनमान्य अधिकृत प्रमाणपत्र दिले जाणार आहे. या प्रमाणपत्राच्या आधारे ‘मुख्यमंत्री रोजगार निर्मिती कार्यक्रम’ तसेच खादी ग्रामोद्योग आणि जिल्हा उद्योग केंद्राच्या माध्यमातून कर्ज उपलब्ध होऊ शकणार आहे. त्यामुळे भविष्यात या बंद्यांना कुणाकडे नोकरी मागण्याची वेळ येणार नाही, तर ते स्वतः रोजगारनिर्माते बनतील.”कारागृह अधीक्षक विजय सोळंके यांनी ‘कारागृहाची सुधारणा व पुनर्वसन’ या ब्रीदवाक्याला अनुसरून हा उपक्रम बंद्यांच्या आयुष्यात सकारात्मक बदल घडवेल, असा विश्वास व्यक्त केला. या प्रशिक्षणामुळे बंद्यांमध्ये आत्मविश्वास वाढेल आणि गुन्हेगारीकडे परत जाण्याऐवजी समाजाच्या मुख्य प्रवाहात सहभागी होण्याची संधी मिळेल, असेही त्यांनी नमूद केले.

या कार्यक्रमाचे सूत्रसंचालन क्रांती सोनमाळी यांनी केले तर शफाकत सय्यद यांनी आभार मानले. यावेळी कारागृह प्रशासनाचे अधिकारी, वैद्यकीय अधिकारी तसेच प्रशिक्षणार्थी बंदी मोठ्या संख्येने उपस्थित होते.हा उपक्रम म्हणजे कारागृहातील बंद्यांच्या पुनर्वसनासाठी उचललेले एक सकारात्मक आणि दिशादर्शक पाऊल असल्याची भावना यावेळी उपस्थितांमध्ये व्यक्त होत होती.