📰एमआयडीसी पोलिसांची धमाकेदार कारवाई..!कंपनीतील तब्बल ३ हजार २०० किलो स्क्रॅप चोरी प्रकरण उघडकीस आरोपी अटकेत,चोरीचा माल हस्तगत

📰एमआयडीसी पोलिसांची धमाकेदार कारवाई..!कंपनीतील तब्बल ३ हजार २०० किलो स्क्रॅप चोरी प्रकरण उघडकीस आरोपी अटकेत,चोरीचा माल हस्तगत

अहिल्यानगर (दि.१० ऑक्टोबर २०२५ (प्रतिनिधी):- अहिल्यानगर एम.आय.डी.सी. पोलिसांनी अत्यंत कौशल्यपूर्ण तपास करून येथील कंपनीतून स्क्रॅप चोरी करणाऱ्या आरोपीस अटक करत तब्बल ३ हजार २०० किलो वजनाच्या स्क्रॅपचा माल हस्तगत करण्यात यश मिळवले आहे.ही कारवाई पोलिसांनी केवळ काही दिवसांत केली असून,औद्योगिक परिसरात पोलिसांचा धडाका पुन्हा एकदा दिसून आला आहे.

फिर्यादी जिग्नेश अरविंद गांधी (धंदा – स्क्रॅप व्यवसाय,रा.विलेपार्ले वेस्ट, मुंबई) यांनी दिलेल्या तक्रारीनुसार,दि.०६/१०/२०२५ रोजी त्यांच्या कंपनीतील स्क्रॅप माल ट्रक क्र. MH16CC1155 वरून मुंबई येथे नेण्यासाठी चालक संजय सोहनराव धामके (रा. दुगणी, ता. सिंदखेडराजा, जि. बुलढाणा) यास देण्यात आला होता.मात्र त्याने सदर ट्रक मधील तब्बल ४ हजार ४० किलो वजनाचा स्क्रॅप माल स्वतःच्या फायद्यासाठी विक्रीस काढला.ही बाब लक्षात आल्यानंतर फिर्यादींनी तत्काळ एमआयडीसी पोलिस ठाण्यात गुन्हा नोंदवला. त्यानंतर वरिष्ठ पोलिस अधिकारी यांच्या मार्गदर्शनाखाली विशेष तपास पथक स्थापन करण्यात आले.सदर गुन्ह्याचा तपास करत असताना, एमआयडीसी पोलिस स्टेशनचे प्रभारी अधिकारी सहाय्यक पोलिस निरीक्षक माणिक चौधरी यांना मिळालेल्या गोपनीय माहितीच्या आधारे चालक संजय धामोडे यास अटक करण्यात आली.

तपासात आरोपीने गुन्ह्याची कबुली दिली असून,त्याच्याकडून ३ हजार २०० किलो स्क्रॅप माल जप्त करण्यात आला आहे.या कारवाईत आरोपीने कंपनीचा विश्वास संपादन करून वाहतूक काम करत असताना मालाचा अपहार केल्याचे उघड झाले आहे. एमआयडीसी पोलिसांच्या जलद आणि अचूक तपासामुळे कंपनीला मोठा दिलासा मिळाला आहे.सदरची कारवाई जिल्हा पोलीस अधीक्षक सोमनाथ घार्गे, अप्पर पोलीस अधीक्षक वैभव कलुबर्मे,उपविभागीय पोलीस अधिकारी नगर ग्रामीण विभाग शिरीष वमने यांच्या सूचना व मार्गदर्शनाखाली एमआयडीसी पोलीस ठाण्याचे सहाय्यक पोलीस निरीक्षक श्री.माणिक चौधरी,पोलीस उपनिरीक्षक मनोज मोंढे,पोलीस अंमलदार राकेश खेडकर,संदीप पवार,राजू सुद्रिक,सचिन आडबल,किशोर जाधव,नवनाथ दहिफळे,ज्ञानेश्वर आघाव,दीपक फुंदे,राजेश राठोड, सुरज देशमुख,जयसिंग शिंदे, दक्षिण मोबाईल सेलचे पोलीस अंमलदार राहुल गुंडू यांनी केली आहे.एमआयडीसी पोलिसांच्या या चोख कारवाईचे सर्वत्र कौतुक होत असून औद्योगिक क्षेत्रातील व्यावसायिकांमध्ये पोलिसांबद्दल विश्वास अधिक दृढ झाला आहे.