📰अहिल्यानगर जिल्ह्यातील मंदिरचोर टोळीचा पर्दाफाश..!१५ मंदिर चोरीचे गुन्हे उघडकीस तब्बल ४ लाख ८३ हजारांचा मुद्देमाल हस्तगत..स्थानिक गुन्हे शाखेची मोठी कारवाई, जिल्हाभरातील भाविकांचा सुटला निश्वास

📰अहिल्यानगर जिल्ह्यातील मंदिरचोर टोळीचा पर्दाफाश..!१५ मंदिर चोरीचे गुन्हे उघडकीस  तब्बल ४ लाख ८३ हजारांचा मुद्देमाल हस्तगत..स्थानिक गुन्हे शाखेची मोठी कारवाई, जिल्हाभरातील भाविकांचा सुटला निश्वास

अहिल्यानगर (दि.११ ऑक्टोबर):-अहिल्यानगर जिल्ह्यातील मंदिरांमध्ये गेल्या काही महिन्यांपासून सुरू असलेल्या चोरीच्या मालिकेचा अखेर पर्दाफाश करण्यात स्थानिक गुन्हे शाखेला यश आले आहे. मंदिर दानपेट्या व देवतांचे दागिने चोरणाऱ्या टोळीचा पर्दाफाश करून तब्बल ४ लाख ८३ हजार रुपये किमतीचा मुद्देमाल जप्त करण्यात आला आहे. या कारवाईत एकूण १५ मंदिर चोरीचे गुन्हे उघडकीस आले असून, भाविक व ग्रामस्थांमध्ये समाधानाचे वातावरण निर्माण झाले आहे.ही कारवाई पोलीस अधीक्षक मा. श्री. सोमनाथ घार्गे यांच्या मार्गदर्शनाखाली स्थानिक गुन्हे शाखेचे पोलीस निरीक्षक किरणकुमार कबाडी यांच्या नेतृत्वाखाली करण्यात आली.

घटनेचा उलगडा कसा झाला?

दि. ४ ते ५ ऑक्टोबर २०२५ दरम्यान पाथर्डी तालुक्यातील श्री शनिमारुती मंदिर,करोडी येथे मंदिरातील दानपेटी फोडून ३.५ लाख रुपये रोख चोरीला गेल्याने पोलीस तपास सुरू होता. पाथर्डी पोलीस ठाण्यात गुन्हा रजि. नं. ११३८/२०२५ बी.एन.एस. कलम ३०३(२) अंतर्गत दाखल करण्यात आला होता.अहिल्यानगर जिल्ह्यात वाढत्या मंदिर चोरीच्या घटनांमुळे पोलीस अधीक्षकांनी स्थानिक गुन्हे शाखेला विशेष मोहीम हाती घेण्याचे आदेश दिले. त्यानुसार तयार केलेल्या पथकाने तपासदरम्यान संशयितांची गुप्त माहिती मिळवून कारवाई केली.

ताब्यातील आरोपी व त्यांचे साथीदार

स्थानिक गुन्हे शाखेच्या पथकाने १० ऑक्टोबर रोजी मिळालेल्या गोपनीय माहितीनुसार खालील आरोपींना अटक केली 

1. राहुल किशोर भालेराव, रा. वडाळा महादेव, ता. श्रीरामपूर

2. रामेश्वर ज्ञानदेव धनेश्वर, रा. भोकर, ता. श्रीरामपूर

3. एकनाथ नारायण माळी, रा. ममदापूर (रा. शिर्डी)

4. शत्रुघ्न मुरलीधर मोरे, रा. टाकळी मानूर, ता. पाथर्डी

यांनी त्यांच्या साथीदारांसह – राहुल भाऊसाहेब माळी, पांडू उर्फ दत्तु मोरे व एक अनोळखी साथीदार – मिळून गेल्या ७-८ महिन्यांत जिल्ह्यातील विविध मंदिरांमध्ये चोरी केल्याची कबुली दिली.

मुद्देमाल जप्ती व उघडकीस आलेले गुन्हे

आरोपींकडून रोख रक्कम, सोन्या-चांदीचे दागिने, दोन मोटारसायकली आणि मोबाईल असा एकूण ₹४,८३,०००/- किमतीचा मुद्देमाल जप्त करण्यात आला.या टोळीने अहिल्यानगर आणि कोल्हापूर जिल्ह्यातील १५ मंदिरांमध्ये चोरी केल्याचे पोलिस तपासात निष्पन्न झाले आहे.

मुख्य सूत्रधाराचा गुन्हेगारी इतिहास

मुख्य आरोपी राहुल किशोर भालेराव हा रेकॉर्डवरील गुन्हेगार असून, त्याच्या विरुद्ध १९ गुन्हे दरोडा, जबरी चोरी, घरफोडी, सरकारी कामात अडथळा आणणे यांसारख्या गंभीर प्रकारचे दाखल आहेत.

पोलीस दलाचे कौतुकास्पद यश

ही कारवाई पोलीस अधीक्षक सोमनाथ घार्गे यांच्या मार्गदर्शनाखाली,स्थानिक गुन्हे शाखेचे पोलीस निरीक्षक किरणकुमार कबाडी,सपोनि हरीश भोये, पोलीस अंमलदार सुरेश माळी, गणेश लोंढे, विष्णु भागवत, फुरकान शेख, राहुल डोके, आकाश काळे, अमृत आढाव, बाळासाहेब गुंजाळ, रोहित येमुल, प्रशांत राठोड, महादेव भांड तसेच महिला पोलीस अंमलदार सोनल भागवत यांनी केली आहे.आरोपीं विरुद्धचा पुढील तपास पाथर्डी पोलीस स्टेशन करीत आहे.