🌍🇮🇳 साता समुद्रापार जुळल्या ‘रेशीमगाठी’…!..व्हिएतनामची कन्या होणार संगमनेरची सून; भारतीय संस्कृतीनुसार होणार दिमाखदार मंगल परिणय!

🌍🇮🇳 साता समुद्रापार जुळल्या ‘रेशीमगाठी’…!..व्हिएतनामची कन्या होणार संगमनेरची सून; भारतीय संस्कृतीनुसार होणार दिमाखदार मंगल परिणय!

संगमनेर (प्रतिनिधी नितीनचंद्र भालेराव):-प्रेमाला जात,धर्म, भाषा,देश यांची सीमा नसते हे पुन्हा एकदा सिद्ध झाले आहे!संगमनेर तालुक्यातील हिवरगाव पावसा येथील तरुणाने थेट व्हिएतनामच्या तरुणीशी प्रेमविवाह करून ‘आंतरराष्ट्रीय रेशीमगाठ’ घट्ट बांधली आहे. हा अनोखा विवाह सोहळा भारतीय बौद्ध संस्कृती आणि व्हिएतनामी परंपरेचा संगम ठरणार आहे.

 ‘संगमनेरचा जावई व्हिएतनामला,आता व्हिएतनामची सून संगमनेरला!’

हिवरगाव पावसा गावातील बाबाजी हनुमंता भालेराव यांचे सुपुत्र संदीप बाबाजी भालेराव आणि व्हिएतनामची कन्या शर्वरी (नुयेन वन तुंग यांची कन्या) यांचा विवाह सोहळा उद्या (२५ ऑक्टोबर) वसंत लॉन्स, संगमनेर येथे थाटामाटात संपन्न होत आहे.या विवाहाला दोन्ही देशांच्या संस्कृतींचे अनोखे मिश्रण अनुभवायला मिळणार आहे.

🎓 संदीपचा प्रवास हिवरगाव पावसातून व्हिएतनामपर्यंत

संदीप भालेराव यांनी अमृतवाहिनी अभियांत्रिकी महाविद्यालयातून ऑटोमोबाईल इंजिनिअरिंग पूर्ण केले. त्यानंतर त्यांनी मोक्ष योगा स्कूल, समनापूर येथून योगा टीचर डिप्लोमा केला आणि गोवा येथील स्टुडिओमध्ये दीड वर्ष योगा टीचर म्हणून कार्य केले.सन २०१९ मध्ये ते व्हिएतनाममध्ये योगा शिक्षक म्हणून कार्यरत झाले.याच ठिकाणी त्यांची ओळख नुयेन वन तुंग यांच्या मुलगी शर्वरी हिच्याशी झाली.ही ओळख मैत्रीत बदलली आणि कुटुंबीयांच्या संमतीने दोघांचा ११ ऑक्टोबर २०२५ रोजी व्हिएतनाममध्ये बौद्ध पद्धतीने विवाह झाला.

🪔भारतीय पद्धतीने ‘मंगल परिणय’

भालेराव कुटुंबीयांच्या आग्रहानुसार भारतीय संस्कृती व बौद्ध परंपरेनुसार संगमनेर येथे पुनश्च विवाह सोहळा आयोजित करण्यात आला आहे.शर्वरी व तिचे आई-वडील आणि कुटुंबीयांसह व्हिएतनामचे वऱ्हाड कालच संगमनेरला दाखल झाले आहे.उद्या वसंत लॉन्स येथे भारतीय बौद्ध संस्कृतीच्या पद्धतीने दिमाखदार मंगल परिणय संपन्न होणार आहे.

👳‍♂️ मान्यवरांची उपस्थिती

या अनोख्या आंतरराष्ट्रीय विवाह सोहळ्यास रिपब्लिकन पार्टी ऑफ इंडियाचे प्रदेश उपाध्यक्ष श्रीकांत भालेराव,राज्य महिला आयोगाच्या सदस्य उत्कर्षा रुपवते,भाजप जिल्हा पदाधिकारी काशिनाथ पावसे,सरपंच सुभाष गडाख यांच्यासह विविध मान्यवर उपस्थित राहणार आहेत.

✨ संस्कृतींचा संगम संगमनेर साक्षीदार!

या विवाह सोहळ्यामुळे भारतीय बौद्ध संस्कृती आणि व्हिएतनामी परंपरेचा अद्भुत संगम अनुभवायला मिळणार आहे.संगमनेर शहर ‘आंतरराष्ट्रीय रेशीमगाठीचा साक्षीदार’ ठरणार आहे.