🎥जेलमधून सुटताच विनापरवाना रॅलीचे सोशल मीडियावर रील बनवणाऱ्या ‘भाईच्या’ एमआयडीसी पोलिसांनी आवळल्या मुसक्या..!

​🎥जेलमधून सुटताच विनापरवाना रॅलीचे सोशल मीडियावर रील बनवणाऱ्या ‘भाईच्या’ एमआयडीसी पोलिसांनी आवळल्या मुसक्या..!

अहिल्यानगर (प्रतिनिधी):-जेलमधून जामिनावर सुटल्यानंतर परिसरात स्वतःची दहशत निर्माण करण्यासाठी बेकायदेशीर दुचाकी रॅली काढणाऱ्या आणि हुल्लडबाजी करून सोशल मीडियावर व्हिडिओ व्हायरल करणाऱ्या एका सराईत गुन्हेगाराच्या अहिल्यानगरच्या एमआयडीसी पोलिसांनी मुसक्या आवळल्या आहेत. ‘भो-या’ ऊर्फ विठ्ठल नवनाथ काळे (वय १९,रा. बोल्हेगाव फाटा,ता.जि. अहिल्यानगर) असे अटक करण्यात आलेल्या मुख्य आरोपीचे नाव असून, त्याच्यासह त्याच्या इतर ६ ते ७ प्रमुख साथीदारांवर आणि १० ते १५ दुचाकीस्वार समर्थकांवर गुन्हा दाखल करण्यात आला आहे.​पोलीस सूत्रांकडून मिळालेल्या सविस्तर माहितीनुसार, आरोपी ‘भो-या’ याच्यावर खून, खुनाचा प्रयत्न, जबरी चोरी यांसारखे अनेक गंभीर गुन्हे दाखल आहेत. नुकताच तो नगर तालुका पोलीस ठाण्याच्या एका गंभीर गुन्ह्यात मा.न्यायालयाकडून दि.०४/०७/२०२६ रोजी जामिनावर मुक्त झाला होता. जिल्हा कारागृह वर्ग-२ येथून बाहेर येताच,त्याने कायद्याची कोणतीही भीती न बाळगता आपल्या गुन्हेगारीचे उदात्तीकरण करण्यास सुरुवात केली.​

तुरुंगातून सुटल्याचा ‘जल्लोष’ साजरा करण्यासाठी त्याने आणि त्याच्या साथीदारांनी मिळून एक मोठा बेकायदेशीर जमाव जमवला. जिल्हा कारागृह ते नागापूर एमआयडीसी दरम्यान मोटारसायकलवर स्वार होऊन मोठ्याने आरडाओरडा करत, घोषणाबाजी करत विनापरवाना मिरवणूक काढली.या हुल्लडबाजीमुळे नागापूर आणि एमआयडीसी भागातील सामान्य नागरिकांमध्ये प्रचंड घबराट व दहशत निर्माण झाली होती.​या गुंडांनी केवळ रॅलीच काढली नाही,तर या बेकायदेशीर मिरवणुकीचा ऑडिओ आणि व्हिडिओ रेकॉर्ड करून तो सोशल मीडियावर ‘रील्स’च्या माध्यमातून मोठ्या प्रमाणावर प्रसारित केला.समाजात दहशत पसरवणे आणि स्वतःची ‘भाईगिरी’ दाखवणे हाच यामागील मुख्य उद्देश होता.हा व्हायरल व्हिडिओ एमआयडीसी पोलिसांच्या सायबर टीमच्या आणि वरिष्ठ अधिकाऱ्यांच्या हाती पडताच, पोलिसांनी तातडीने चक्र फिरवली आणि मुख्य आरोपी ‘भो-या’ याला जेरबंद केले. एमआयडीसी पोलीस स्टेशनमध्ये सरकारी आदेशांचे उल्लंघन आणि दहशत निर्माण केल्याप्रकरणी गु.र.नं. ५२६/२०२६ नुसार भारतीय न्याय संहिता (BNS) व मोटार वाहन कायद्याच्या विविध कलमांखाली गुन्हा दाखल करण्यात आला आहे.​धक्कादायक बाब अशी की,अवघ्या १९ वर्षांच्या या आरोपीवर अहिल्यानगरमधील विविध पोलीस ठाण्यांमध्ये तब्बल १० गंभीर गुन्हे दाखल आहेत. ​सदरची धडक कामगिरी पोलीस अधीक्षक मुम्मका सुदर्शन  यांच्या मार्गदर्शनाखाली, एमआयडीसी पोलीस स्टेशनचे प्रभारी अधिकारी सपोनि.हेमंत थोरात,सफौ.राकेश खेडकर, पोहेकॉ.राजू सुद्रिक,पोहेकॉ.शैलेश रोहोकले,पोहेकॉ.संदीप पवार,पोहेकॉ.गणेश चौधरी, पोकॉ.किशोर जाधव,पोकॉ. दहिफळे आणि पोकॉ दीपक फुंदे यांच्या पथकाने अत्यंत चाणाक्षपणे पार पाडली आहे.
​“परिसरात दहशत निर्माण करण्याचा किंवा गुन्हेगारीचे उदात्तीकरण करण्याचा प्रयत्न केल्यास गय केली जाणार नाही.सोशल मीडियावरील अशा स्टंटबाजांवर आमची करडी नजर आहे,” असा कडक इशारा पोलिसांनी दिला आहे.