अहमदनगर (दि.२ एप्रिल):-संगमनेर शहरातील शिवाजीनगर येथून विक्रीस आणलेला गांजा व हेरॉईनसह आरोपी जेरबंद करण्यात स्थानिक गुन्हे शाखेच्या पथकास यश आले आहे.बातमीची हकिगत अशी की,आगामी लोकसभा निवडणुकीच्या अनुषंगाने जिल्हा पोलिस अधीक्षक श्री.राकेश ओला यांनी स्थानिक गुन्हे शाखेचे पोनि/श्री.दिनेश आहेर यांना जिल्ह्यातील अवैध धंद्याची माहिती काढुन त्यांचे विरुध्द कारवाई करणेबाबत आदेशित केले होते.
नमुद आदेशान्वये स्थानिक गुन्हे शाखेतील पथक जिल्ह्यातील संगमनेर शहरातील अवैध धंद्यांची माहिती काढत असताना सपोनि/हेमंत थोरात यांना इसम नामे अंबादास शिंदे (रा. शिवाजीनगर,ता.संगमनेर) हा त्याच्या कब्जात गांजा व हेरॉईन बाळगुन त्याचे राहते घरी विक्री करतो अशी गुप्तबातमीदारा मार्फत खात्रीशीर बातमी मिळाली. त्यानंतर पथकाने तात्काळ स्टाफ तसेच पंच व साधने सोबत घेवुन छाप्याचे नियोजन केले.पथकाने लागलीच बातमीतील शिवाजीनगर,ता.संगमनेर या ठिकाणी जावुन संशयीत नामे अंबादास शिंदे याचे वास्तव्याबाबत माहिती घेवुन, त्याचे राहते घरासमोर जावुन खात्री करता सदर घरात एक इसम पलंगावर बसलेला दिसला.त्यास पोलीस पथकाची ओळख सांगुन त्याचे नाव गांव विचारले असता त्याने त्याचे नाव अंबादास शांताराम शिंदे (रा. जैन सर्कल,शिवाजीनगर,ता. संगमनेर) असे असल्याचे सांगितले.त्याची व घराची पंचा समक्ष झडती घेता संशयीत बसलेल्या पलंगाचे खाली पांढरे रंगाच्या गोणीत उग्र वास येत असलेला बिया बोंडे,काड्या पाने संलग्न असलेला पाला मिळुन आला.
तसेच त्याचे पॅन्टचे खिशात प्लॅस्टीकचे पारदर्शक पिशवीत विटकरी रंगाची पावडर मिळुन आली.पथकाने पलंगाची पाहणी करता पलंगामध्ये असलेल्या लोखंडी पत्र्याचे पेटीमध्ये भारतीय चलनातील विविध दराच्या नोटा मिळुन आल्या.पथकाने पांढरे रंगाच्या गोणीत मिळुन आलेला बिया बोंडे, काड्या पाने संलग्न असलेला पाला या बाबत विचारणा करता त्याने पांढ-या रंगाच्या गोणीत बिया बोंडे, काड्या पाने संलग्न असलेला पाला हा गांजा व पारदर्शक पिशवीतील पावडर ही गर्द/हेरॉईन असुन विक्रीसाठी आणल्याचे सांगितल्याने घरात पांढ-या रंगाच्या गोणीत ठेवलेला 45,030/- रुपये किंमतीचा 04 किलो 498 ग्रॅम वजनाचा अंमली पदार्थ गांजा, 72,000/- रुपये किंमतीचा गर्द/हेरॉईन व 4,00,150/- रुपये रोख रक्कम असा एकुण 5,17,180/- रुपये किंमतीचा मुद्देमाल मिळुन आल्याने तो हस्तगत करुन आरोपी विरुध्द संगमनेर शहर पोलीस स्टेशन गु.र.नं. 325/2024 गुंगीकारक औषधिद्रव्ये आणि मनोव्यापारावर परिणाम करणारे पदार्थ कायदा सन 1985 चे कलम 8 (क), 20 (ब) ii, 21 प्रमाणे गुन्हा दाखल करण्यात आला असुन सदर गुन्ह्याचा पुढील तपास संगमनेर शहर पोलीस स्टेशन हे करीत आहे.
सदरची कारवाई श्री.राकेश ओला पोलीस अधीक्षक,श्री.वैभव कलुबर्मे अपर पोलीस अधीक्षक श्रीरामपूर,श्री. सोमनाथ वाघचौरे उविपोअ, संगमनेर विभाग यांचे सुचना व मार्गदर्शना खाली स्थानिक गुन्हे शाखेचे सपोनि/हेमंत थोरात व अंमलदार सचिन अडबल,संतोष खैरे,अमृत आढाव,प्रमोद जाधव, उमाकांत गावडे यांनी केली आहे.