निराधार दिव्यांग वृद्ध महिलेच्या मदतीसाठी डॉ.सुजय विखे पाटील यांची तत्परता..सामाजिक कार्यासाठी मा.नगरसेवक धनंजय जाधव यांची 24 तास साथ
अहिल्यानगर (प्रतिनिधी):-एक निराधार व दिव्यांग वृद्ध महिलेला निराधार योजनेच्या लाभासाठी चक्क फरफटत जिल्हाधिकारी कार्यालयात यावे लागले,ही अत्यंत वेदनादायक वार्ता एका वृत्तपत्रात प्रसिद्ध झाली.सदर बातमी वाचताच मा.खासदार डॉ. सुजय विखे पाटील यांनी त्वरित दखल घेतली आणि सदर महिलेला सहाय्यक साधनांची मदत करण्याच्या अनुषंगाने पाऊले उचलली.महिला अहिल्यानगर शहरातील सिद्धार्थनगर भागात राहत असल्याचे समजताच,त्यांनी तातडीने त्या परिसराचे मा. नगरसेवक श्री.धनंजय जाधव यांच्याशी संपर्क साधून संबंधित वृद्ध महिलेचा शोध घेण्याच्या सूचना दिल्या.
शोध घेतल्यानंतर सदर महिला तपोवन रस्त्यावर आढळून आली.दरम्यान डॉ. सुजयदादा विखे पाटील यांच्या सूचनेनुसार त्या महिलेस विळदघाट येथील डीआरडीसी सेंटरमध्ये तातडीने दाखल करण्यात आले.अवघ्या एका तासात त्यांची वैद्यकीय तपासणी करून आवश्यक सहाय्यक साधनांचे वितरण देखील करण्यात आले.या तात्काळ मदतीमुळे केवळ त्या वृद्ध महिलेला आधार मिळालेला नाही,तर संपूर्ण समाजात एक सकारात्मक संदेश गेला आहे की लोकप्रतिनिधी जर संवेदनशील आणि कृतीशील असतील,तर कोणतीही यंत्रणा अपयशी ठरत नाही.डॉ.सुजय विखे पाटील यांनी दाखविलेल्या तत्परतेमुळे एक निराधार महिलेला आधार मिळाला असून याबद्दल डॉ. सुजय विखेंनी समाधान व्यक्त केले आहे.