📚 ग्रंथ दिंडीने भारावले निमगाव..!..कुसुमाग्रज वाचन अभियानांतर्गत बालवाचनालयाचे उद्घाटन..वाचनाने जीवन समृद्ध होते केंद्रप्रमुख बाबासाहेब पिलगर

📚 ग्रंथ दिंडीने भारावले निमगाव..!..कुसुमाग्रज वाचन अभियानांतर्गत बालवाचनालयाचे उद्घाटन..वाचनाने जीवन समृद्ध होते केंद्रप्रमुख बाबासाहेब पिलगर

श्रीरामपूर (प्रतिनिधी):-तालुक्यातील निमगाव खैरी येथील निमगाव प्राथमिक शाळेत अहिल्यानगर जिल्हा परिषदेचे मुख्य कार्यकारी अधिकारी आनंद भंडारी यांच्या संकल्पनेतून राबविण्यात येत असलेल्या कुसुमाग्रज वाचन अभियान अंतर्गत ग्रंथ दिंडी व बालवाचनालय उद्घाटन कार्यक्रम अत्यंत उत्साहात संपन्न झाला. शाळेच्या परिसरात विद्यार्थ्यांच्या जल्लोषात आणि पुस्तकप्रेमाच्या वातावरणात हा कार्यक्रम पार पडला.यावेळी प्रमुख पाहुणे केंद्रप्रमुख बाबासाहेब पिलगर यांनी मार्गदर्शन करताना सांगितले की, “पाठ्यपुस्तकाबरोबर अवतार पुस्तकांच्या वाचनामुळे जीवन समृद्ध होते. वाचनामुळे विद्यार्थ्यांचा सर्वांगीण विकास होतो आणि विचारसरणी घडते.” त्यांच्या प्रेरणादायी शब्दांनी उपस्थित विद्यार्थी व पालकांना वाचनाचे महत्त्व अधोरेखित झाले.

कार्यक्रमाची सुरुवात ग्रंथ दिंडीने झाली. वारकरी पोशाख परिधान केलेल्या विद्यार्थ्यांनी हातात पुस्तके, घोषवाक्ये, टाळ आणि आकर्षक पालखी घेत परिसरात फेरी काढली. पुस्तकांनी सजविलेल्या या पालखीने आणि घोषणांनी उपस्थितांचे विशेष लक्ष वेधून घेतले. संपूर्ण वातावरण वाचन संस्कृतीने भारावून गेले होते.कार्यक्रमाचे प्रास्ताविक व अध्यक्ष निवड शिक्षिका सुधा गमे यांनी करून पुस्तक वाचनाचे महत्त्व स्पष्ट केले. अनुमोदन प्रतिभा तोरणे यांनी दिले. कार्यक्रमाच्या अध्यक्षस्थानी वेणुनाथ कालंगडे होते. बालवाचनालयाचे उद्घाटन केंद्रप्रमुख बाबासाहेब पिलगर यांच्या हस्ते करण्यात आले.

डिजिटल युगातही पुस्तकांचे महत्त्व अबाधित असल्याचे सांगताना मुख्याध्यापक संतोष वाघमोडे यांनी विद्यार्थ्यांसह पालकांनीही अवांतर वाचन करावे आणि मुलांच्या वाढदिवसानिमित्त शाळेला पुस्तके भेट देण्याचे आवाहन केले. त्यांच्या या आवाहनाला सकारात्मक प्रतिसाद देत पालक अर्चना जिवरख व महेंद्र साबळे यांनी बालवाचनालयासाठी प्रत्येकी पाचशे रुपयांची पुस्तके भेट दिली.कार्यक्रमास व्यवस्थापन समिती अध्यक्ष गणेश तरस, उपाध्यक्ष महेंद्र साबळे, चांगदेव कालंगडे, सदस्या अर्चना जिवरख, जयश्री भागडे, छाया धुळगंड, भिमाबाई काकडे, भामाबाई धुळगंड, अंगणवाडी सेविका अनिता काजळे, बेबीताई ढोबळे, आरती सोनवणे आदी मान्यवर उपस्थित होते.शेवटी मिना निकम यांनी उपस्थितांचे आभार मानले. कार्यक्रम यशस्वी करण्यासाठी मुख्याध्यापक संतोष वाघमोडे, शिक्षिका प्रतिभा तोरणे, मिना निकम आणि सुधा गमे यांनी विशेष प्रयत्न केले.

वाचन अभियान यशस्वीपणे राबवल्याबद्दल सरपंच दत्तात्रय झुराळे, उपसरपंच विजयसिंग परदेशी, माजी उपसभापती नितीन भागडे, गटशिक्षणाधिकारी संजीवन दिवे, शिक्षण विस्तार अधिकारी दीपक त्रिभुवन आणि केंद्रप्रमुख बाबासाहेब पिलगर यांनी शाळेचे अभिनंदन केले.निमगाव प्राथमिक शाळेतील हा उपक्रम विद्यार्थ्यांमध्ये वाचन संस्कृती रुजविण्यासाठी महत्त्वपूर्ण ठरत असून, भविष्यातही अशा उपक्रमांमुळे ज्ञानाची गंगा अखंड वाहती राहील, असा विश्वास व्यक्त केला जात आहे.